RÊÇA HEVDÎTINÊ

Ezê çi  bikim

Ji van dilînîyan

Ku tim kiştîya hezê min

Ber bi kişwera evîna teve

Dajon ...?

Û rêça hevdîtinê

Alîk ave yek agire

Piştî gelek çîyayên xwê û xwêdanê

Ber digire ...

Ku simê hespê min

Hezar carî dilikome ...

Tim siwarim di şevêde

Rêwîme di her rêde

Û badlîzokên vîna min

Ji hawîrde te dorpêç dikin

Gava çavên tenî gandêre

Dibin du gelawêj

Û gelî yê sînga te

Tenik-bayê şeva divê

Hingê dilê min

Volkanekî agire ...

Şeva bûrî ne xewin bû

Di tarîya şevêde

Lêvê min hevendekî birçî

Li buhara te diçêrîya

Û nema zanim

Ku xwêdana gerdena te

Şorav bû yan buharat bû

Hinavê min diperitî ....

Dojehek mêyane

Li kevî yê jînê min disoje

Ez ar-perestim

Arê te çendî geş û gûr be

Wê dilê min di nav destên te de

Xweş tembûr be ...

De hinermendîya xwe

Bo min pêşkêşke

Û awaza ku te jenî

Bila nerm û kûr be ...  

 XEMGÎN Ê REMO  Qamişlo/19/6/2007