NOBEDAR

Fîzfîz û gujguja ba yê ye

Li gerdûnê diramim

Dûr û nêzîk

Cihin difûrin ,

Cihin sar dibin ,

Hinek dikenin ,

Hinek digrîn . . .

Diçim û têm

Rêya kakêşa dipîvim

Lê . . dawî lê nayê . .

Dengek bilind dibe

Pêlpêlokên bi şewat

Digihin min

Qêrîna dayîkekî tê

Pêlek dî  dikeve nav pêlên

Zehmetkêşan ,

Nûza dikene ,

Bi xudêdana xwere bûye

Rêwengî , mişext û revend  . . .

Kî dizane çarenûsa wî . . wê çibe ?

. . . . .

koçera konê xwe vedan ,

zivistanê îsal zû barkir

biharek a rengîn malovaniyê dike . . .

kerengzer û gezoyê

               pêşkêş dike . . .

her dîmen li xweşya min diçe

kaniya peyvan li min diteqe

ezê jî bistirînim . . .

ezê jî bistirînim bi çiya re ,

bi giya re ,

bi solav û tilûran re ,

bi ba û gulçîçekan re ,

bi nêçîrvanan re . . .

ezê bistirînim û

keserên dirêj berdim ,

di her newalê de

şopa xwe dihêlim

di her zinarî de alê diçikilînim ,

wêneyan . . di tehtan de

dikolim . . .

stêran dijmêrim

li hêvya stêra berbangê me ,

Bist û Pêr  û Komka sêwiyan

çavê wan ji min qerimîn ,

kakêş xilmaş bû

lê ez ne razam û

ne westiham .

* * * * * *

   CIWAN DÊRIKÎ -DÊRIK – 26 / 3 / 2007 *